கோந் ஜல்லந் யே லோகு³ர் கோந் ஜல்லநு

கண்ணினு

கோந் ஜல்லந் யே லோகு³ர் கோந் ஜல்லநு
கோ³பால்த³ய பாத்ர ஹொயாஸ்தென் ஜல்லநு
மாந்ஹோர் ஐகுநாஸ்தொ காநும் க²ள்ளெரே--ஸ்ரீ
மாத⁴வ ராஜயோக³ம் யே க²ள்ளெரே   [கோ]

அப்⁴யாஸ் கரஸ்தெவேள் ஆங்கு⁴ன்ன ஹோய்
ஹரளி மூளு பநிலீலெத்தியே ஜாய்
கொ²ப்³பி³ம் பி³ர்மானந்த³ம்மு ரெ:ய்லுவாய்--கோ³
ஹிண்டே³த் எம தா³ஸொய் பஸ்கட் ஜவாய்   [கோ]

பத்மாஸனம் தைலி தூ பீ³ஸிரே--ஹாத்
பாய்ம்பொள்ளி ஸெரீர் நித்தக பீ³ஸிரே
பத்³மநாபு⁴ த்⁴யாந்ஹோர் பீ³ஸிரே
பா பஸ்கி த⁴மய் வாட் யேஸ் பீ³ஸிரே   [கோ]

சார்பாய்ந் திவிஹோரு பீ³ஸிரே
சார்பாயிந் பநிம் ர:வள்ளெரெ
சார்போ³ட் ஜாந்தேனாஸ்த தெ⁴ரி ஜை:ய்லெரே-இஸ
சல்த சல்த வாட்ஹோய் து ஸெய்லெரே   [கோ]

மிங்கி³ பிஸ்ளானுவாட் தே³ந்ஹோநாரே--சொக்கட்
மோக்ஷியாஸென் நீ:ஸ்தெங்க ஸெங்கோ⁴நாரே
ஹுங்கி³ து⁴ளெதி ஹிங்க³ந்முஸ்நாரே--ஹோங்கு³
நீ:ஸ்தக³ஸ்க ஜகே³த் கை முஸ்நாரே  [கோ]

ஹோங்கு³ன்ன உபிர் கர்லன் ஹோநாரே--பா⁴த்
உன்ன உபிர் கான் ஹோநாரே
ஜாங்கு³தைய்லி சலை 'ஓம்' வாட் யேட் ஸேரே
மொ:ட்டான் ஜநி ஸங்கி³ரியாஸ் அங்கு³ன்ஸேரே  [கோ]

ராமாநுஜா மெநெத் பாப் ராக் ஹொய் ஜாய்
ராதி தீ³ஸுமு த்⁴யாந் கரேதிஸ் ஜாய்
யேமார்க்கு³ நீ:ஸ்தெனொ யெமாகொ²ய் ஜாய்
யேவாட் ஹாத் தெ⁴ல்லி சலேத் ஜெலும் நீ:ஜாய்   [கோ]